बँकॉकमध्ये करण्यासारख्या नि:शुल्क गोष्टी

मी जेव्हा जेव्हा प्रवास करते तेव्हा तेव्हा माझ्या उत्साहाला सीमा नसते. आणि माझा उत्साह तेव्हाच शिगेला पोहोचतो जेव्हा पर्यटनस्थळी करावयाच्या गोष्टी अगदी नि:शुल्क उपलब्ध असतात. यामुळेच मी ‘करण्यासारख्या नि:शुल्क गोष्टी’ ही श्रृंखला लिहण्यास आरंभ केला व या नि:शुल्क गोष्टींची सुरुवात बँकॉकपासून करीत आहे.

शहरातील भटकंती

आठवड्याच्या कामाच्या दिवसांमध्ये स. 10 ते सं. 6 दरम्यान व विकेंडला स. 9 ते सं. 7 दरम्यान आपल्या पासपोर्टची एक प्रत दाखवून ‘बँकॉक स्माईल्स बाईक’कडून एक सायकल नि:शुल्कपणे भाड्याने घ्या. आपण त्यांच्या कुठल्याही केंद्रामधून सायकल घेऊ शकता. त्याकरिता रत्तनाकोसिन भागामध्ये पाच आणि नदीपलीकडे सात केंद्रांवर ही सुविधा उपलब्ध आहे. लक्षात ठेवा की, आपण ज्या केंद्रावरून सायकल घेतली आहे, तिथेच आपल्याला ती परत करायची आहे. जर सायकलिंगची आपल्याला आवड नसेल तर आपण शहराचा स्वत: मार्गदर्शन करणारा पदभ्रमण टूर सुद्धा करू शकता. 

 

पार्क, पार्क आणि भरपूर सारे पार्क!

बँकॉकमध्ये बरेच पार्क आहेत जेथे आपण शांतपणे बसून विश्रांती घेऊ शकता. शहराच्या काही पार्कमध्ये व्यायामाची काही नि:शुल्क यंत्रे सुद्धा आहेत:

• लुम्पिनी पार्क हा शहराच्या केंद्रभागातील मऊ हिरवेगार लॉन असलेला 58 एकरांचा पार्क आहे, ज्यामध्ये दोन तलाव आहेत जेथे रोविंग आणि पॅडल बोटी भाड्याने (मात्र नि:शुल्क नाही) उपलब्ध आहेत. आपण विशेषकरून डिझाईन केलेल्या टेबलवर चेस आणि चेकर्स खेळू शकता व सोबतच पार्कच्या परिसरातील सार्वजनिक लायब्ररीला भेट देऊ शकता. प्रत्येक दिवशी सं. 6 वाजता येथे नि:शुल्क एरोबिक क्लासेस सुद्धा घेतले जातात. बँकॉक सिंफनी ऑर्केस्ट्रा या रॉक बँड किंवा काही पारंपारिक थाई संगीताच्या कॉन्सर्टचा आनंद घेण्यासाठी डिसेंबर आणि जानेवारीचे महिने खूपच उपयोगी आहेत. परफॉर्मन्स सामान्यपणे सं. 5 वाजता सुरू होत असतात. (वेळ: स. 5 ते सं. 7 | पत्ता: रामा चार रोड, रत्चादामरी आणि विथ्थायू रोडच्या मध्ये).
• बेंचासिरी पार्क हे कलाप्रेमींकरिता आहे जेथे महाराणी सिरिकीट यांची प्रतिमा असलेल्या स्मरणार्थ नाण्याची प्रतिमा आहे आणि या विशाल मैदानावर समकालीन शिल्पकलेचे इतर नमुने पसरलेले आहेत (वेळ: स. 5 – रा. 8 | पत्ता: सुखुमवित रोड, सोई सुखुमवित 22-24 च्या मध्ये)
• दी फारा नाखोन एरिया, जो बँकॉकचा ऐतिहासिक भाग सुद्धा आहे, येथेही बरेच पार्क आहेत, जसे की रोम्मानिनट पार्क, सनम लाऊंग, सांती चाई प्राकन पव्हेलियन आणि पब्लीक पार्क आणि सरानरोम पार्क.

चायनाटाऊनला भेट द्या

चायनाटाऊनला भेट देणे अगत्याचेच आहे. लहान स्टॉल्स, स्ट्रीट फूड आणि सोन्याच्या दुकानांनी गच्च भरलेल्या या जागी उत्साह ओसंडून वाहत असतो. जर आपण फेब्रुवारीच्या दरम्यान चीनी नव-वर्षाकरिता चायनाटाऊनला भेट दिली तर आपण येथील जल्लोष चरम सीमेवर असताना बघू शकता! वट चक्रावत टेम्पल कॉम्प्लेक्समधील गुप्त रहस्य म्हणजे तेथील तीन विशाल मगरी आहेत ज्या आपल्या गडद रंगाच्या तळ्यामध्ये पुढील भक्षाची वाट बघत पहुडलेल्या असतात.

चाटुचक विकेंड मार्केट

जगातील सर्वात मोठा खुला बाजार म्हणून ओळखले जाणारे चाटुचक विकेंड मार्केट हे 35 एकर जागेवर पसरलेल्या 5,000 स्टॉल्सचे घर आहे, ते सकाळी 9 वाजता उघडते आणि दुपारची जेवणाची वेळ होत पर्यंत येथे चांगल्यापैकी गर्दी जमते. आपण विंडो शॉपिंग केल्यानंतर, काही स्थानिक खाद्यपदार्थांची लज्जत चाखू शकता आणि विश्रांती घेण्याकरिता चाटुचक पार्ककडे प्रयाण करू शकता.

 

रॉड फाई मार्केट

प्राचीन वस्तूंचा विलक्षण साठा असलेल्या या बाजारात आपण भन्नाट आणि विलक्षण वस्तू बघून विस्मयचकित व्हाल, जसे सुपरमॅनचा पुतळा, हत्तीच्या आकाराची कॅरोसल कार, काही जुन्या कार आणि स्थानिक स्वस्त खाद्यपदार्थांसोबतच इतर विचित्र वस्तू येथे बघायला मिळतील. (वेळ: सं. 5 ते मध्यरात्रीपर्यंत, शुक्रवार ते रविवार | पत्ता: काम्फेंग फेट, चाटुचक मार्केटच्या मागे)

पपेट शो बघा

बँकॉकमधील आर्टिस्ट हाऊस सारखी खूपच कमी ठिकाणे आहेत जेथे आपण थाई पपेट्री सारख्या नामशेष होणाऱ्या कलेचा आनंद घेऊ शकता. प्रत्येक दिवशी (बुधवार व्यतिरिक्त) दु. 2 वाजता, गोष्ट सांगण्याकरिता या नाजुक बाहुल्यांच्या प्रेक्षणीय हालचाली आपण बघू शकता. सुमारे 600 वर्ष जुना स्तूप आणि भव्य आकाराचे पुतळे असलेले हे ठिकाण बघणे म्हणजेच डोळ्यांकरिता पर्वणीच आहे. (वेळ: स. 10 ते सं. 6 | पत्ता: सोई वट थाँग साला नगरम, फासी चॅरोन, वट कुहासवन मंदिराजवळ)

बटरफ्लाय गार्डन आणि इनसेक्टीरियम

या गजबजलेल्या शहराच्या केंद्रभागी, बटरफ्लाय गार्डन आणि इनसेक्टीरियम अभयारण्यामध्ये 500 च्या वर फुलपाखरांच्या प्रजाती झाडे व फुलांवर भिरभिरत असतात आणि एक धबधबा नैसर्गिक वातावरणाची शोभा वाढवत असतो. (वेळ: स. 8.30 – सं. 4.30 सोमवार व्यतिरिक्त | पत्ता: चाटुचक मार्केटच्या कोपऱ्यावर, रोटफाई आणि क्विन सिरिकीट गार्डन्सच्यामध्ये)

मंदिर दर्शन

थायलंडमधील प्रत्येक भागात एक मंदिर आहे. काही ठिकाणी विदेशी लोकांसाठी प्रवेश फी आकारली जाते, मात्र जर आपण लवकर गेलात तर तिकीट खिडकी उघडण्यापूर्वी आपण स्थानिक लोकांमध्ये मिसळू शकता. काही मंदिरे नि:शुल्क आहेत जसे वट मांगकोर्न कमलावट (चायनाटाऊन), वट पाटूम वानरम (सेंट्रल वर्ल्ड प्लाझा शॉपिंग सेंटर समोर) आणि वट इंद्रविहारन (डुसित).

 

विलोभनिय सूर्यास्त

सूर्य मावळताना बघणे नेहमीच उदात्त अनुभव असतो. सुदैवाने, तो नेहमीच नि:शुल्क असतो! मात्र चाओ फार्या नदीच्या मागे असणाऱ्या वट अरूणच्या मागे त्याला अस्त होताना बघणे हा अनुभव काही वेगळाच आहे.

संग्रहालयांना भेटी द्या

• बँकॉकियन संग्रहालय – नि:संशयपणे हे बँकॉकचे सर्वात सुंदर संग्रहालय आहे आणि याला बँकॉक फोल्क म्युझियमही म्हटले जाते. येथे 1950च्या काळातील लाकडी घरांचे प्रदर्शन मांडलेले आहे ज्याद्वारे त्या काळातील सामान्य मध्यमवर्गीय लोकांचे राहणीमान दाखवलेले आहे. (वेळ: स. 10 – सं. 4 बुधवार ते रविवार | पत्ता: सोई चॅरोन क्रुंग 43)
• करेक्शन्स म्युझियम – येथे एका तुरुंगाला संग्रहालयामध्ये रूपांतरित करण्यात आले आहे, ज्यामध्ये बँकॉकच्या इतिहासात कैद्यांना शिक्षा देण्यासाठी वापरण्यात आलेल्या विविध साहित्यांचे प्रदर्शन मांडण्यात आले आहे. करेक्शन्स म्युझियममध्ये मानवी आकाराचे मेणाचे पुतळे ठेवलेले आहेत, जे विविध कठोर शिक्षा देतानाचे दृश्य सादर करतात, सोबतच शिक्षेची साधने आणि हत्यारे व फोटोग्राफ सुद्धा मांडलेले आहेत. (वेळ: स. 9.30 – सं. 4.30 सोमवार ते शुक्रवार | पत्ता: महा चाई रोड)
• रॉयल एलिफंट म्युझियम – शाही हत्तीशाळेला आता संग्रहालयामध्ये बदलण्यात आले आहे, जेणेकरून या राष्ट्रीय प्राण्याचे थाई चालीरिती, इतिहास आणि संस्कृतीमधील महत्त्व अधोरेखित करता येईल. (वेळ: स. 9 – सं. 4 | पत्ता: डुसित डिस्ट्रिक्ट)
• बँकॉक डॉल्स म्युझियम – सुमारे 400 पेक्षा जास्त बाहुल्यांचा संग्रह असलेल्या या आंतरराष्ट्रीय पातळीवर ख्यातीप्राप्त बँकॉक डॉल्स म्युझियममध्ये पारंपारिक आणि आदिवासी पेहरावातील हस्तनिर्मित बाहुल्यांचे प्रदर्शन मांडलेले आहे. येथे आंतरराष्ट्रीय बाहुल्यांचा एक विभाग सुद्धा आहे. (वेळ: स. 8.30 – सं. 5 मंगळवार ते शनिवार | पत्ता: रस्ता 85 सोई रॅचताफन)

ईरावन श्राईनमध्ये थाई नृत्य

नॅशनल थिएटरमधील नृत्य प्रदर्शन बघणे मुळीच चुकवू नका. चिडलोम स्काय ट्रेन स्टेशनसमोरील आकर्षक ईरावन मंदिरात आपण काहीही पैसे खर्च न करता याचा आनंद घेऊ शकता. मंदिरात भाविकांची गर्दी असते आणि ते मेणबत्त्यांनी उजळून निघालेले असते. धूपाच्या सुगंधाने वातावरण सुगंधित झालेले असते आणि पार्श्वभूमीला थाई संगीत वाजत असते. विशेष म्हणजे, प्रणयामध्ये आनंदाकरिता देवाचा आशीर्वाद मिळवण्यासाठी केले जाणारे हे नृत्यप्रकार प्रार्थनेचेच एक स्वरूप आहे!

कला प्रदर्शने

बँकॉक कला आणि संस्कृती केंद्र हे बँकॉकमधील सर्वोत्तम नि:शुल्क प्रदर्शन केंद्र आहे. आपण या शहरात असताना कुठले प्रदर्शन सुरू आहे हे जाणून घ्या आणि एक बाह्त (थाई चलन) सुद्धा खर्च न करता आपण याचा आनंद घेऊ शकाल!

थाई बॉक्सिंग बघा

सियाम भागातील एमबीके सेंटर बाहेर प्रत्येक बुधवारी सं. 6 वाजता थाई बॉक्सिंग सामना आपण बघू शकता.

 

वाय-फाय

सेंट्रल वर्ल्ड प्लाझा, सियाम डिस्कव्हरी सेंटर, ईरावन सेंटर आणि शहरातील इतर बऱ्याच मॉल्स, रेस्टॉरंट आणि कॅफेमध्ये नि:शुल्क वाय-फाय उपलब्ध आहे.

पुढच्या वेळेस बँकॉकमध्ये असताना या ‘स्वस्त रोमांचक’ गोष्टींचा आनंद घ्या! जर आपल्याला बँकॉकमध्ये करण्यासारख्या आणखी नि:शुल्क गोष्टी आढळल्या तर त्यांचा या यादीमध्ये समावेश करण्यासाठी आम्हाला कळवण्यास विसरू नका.

Book Your Flight from New Delhi To Bangkok